Бишкек мэриясы ЕРӨБ менен биргелешкен долбоорлорду талкуулады

Бишкек шаардык мэриясында мэр Айбек Джунушалиев Европалык реконструкция жана өнүктүрүү банкынын (ЕРӨБ) өкүлдөрү менен жолугушуу өткөрдү. Бул тууралуу муниципалитеттен билдирди.

Жолугушууда Бишкек шаарында ишке ашырылып жаткан биргелешкен долбоорлор, анын ичинде жылуулук жана суу менен камсыздоо тармактары, ошондой эле борбор калаанын "Жашыл шаарлар" программасына катышуусу талкууланды.

Мэр шаарда пландалып жаткан негизги долбоорлор тууралуу маалымат берип, экотехнологиялык заводду куруу, жашылдандыруу жана абанын сапатын жакшыртуу багытындагы иштерге токтолду. Белгиленгендей, 2025-жылы Бишкекте 19 миң көчөт отургузулса, 2026-жылы 50 миңге жакын көчөт отургузуу пландалууда.

Өз кезегинде ЕРӨБдүн өкүлдөрү Бишкек шаарынын 2050-жылга чейинки Генералдык планынын алкагында каралган долбоорлорду ишке ашырууга колдоо көрсөтүүгө даяр экендиктерин билдиришти.

Жолугушуунун жыйынтыгында тараптар кызматташууну мындан ары да улантууга макулдашты.