Бишкек шаарында автоунаа уурдоого шектелген жаран кармалды

2026-жылдын 17-январында Бишкек шаарынын Б.К. аттуу жараны жазуу жүзүндө арыз менен Свердлов районунун ИИБна кайрылып,  белгисиз адам Зеленая көчөсүндөгү жеке үйдүн жанында токтоп турган «Volkswagen Polo» үлгүсүндөгү автоунааны мыйзамсыз айдап кеткенин билдирген.

Бишкек шаарынын ИИББнын Басма сөз кызматынын маалыматына ылайык, бул факт боюнча Свердлов районунун ИИБнын тергөө кызматы тарабынан КРнын Кылмыш-жаза кодексинин 211-беренеси (унаа уурдоо) боюнча кылмыш иши козголуп тергөө иштери жүргүзүлгөн.

Ыкчам-тергөө иш-чараларынын алкагында, Бишкек шаарынын ИИББнын кызматкерлери видеокөзөмөл камераларынын жазууларын изилдеп, шектүүнүн өздүгүн аныкташты. Ал мурда бир нече жолу кылмыш жоопкерчилигине тартылган, 2005-жылы туулган Т.А. болуп чыккан.

Шектүү кармалып, тергөө кызматына жеткирилген. Тергөөнүн жүрүшүндө ал автоунааны уурдагандан кийин калтырып кеткен жерин көрсөтүп берген.

Учурда кылмыш иши боюнча тергөө иштери улантылууда.