Кытай Кыргызстанда айыл чарба техникасын чогултуучу завод курууга кызыкдар
Суу ресурстары, айыл чарба жана кайра иштетүү өнөр жайы министринин орун басары Бектен Бекболотов Кытайдын Айыл чарба машиналарын куруу ассоциациясынын аткаруучу төрагасы Лю Хуаньли баштаган делегация менен жолугушуу өткөрдү.
Жолугушууда айыл чарба техникасы тармагындагы кызматташтыкты кеңейтүү маселелери талкууланды. Тараптар айыл чарба техникасы боюнча жыл сайын өткөрүлүүчү эл аралык көргөзмөлөргө кыргыз тараптын катышуу мүмкүнчүлүгүн, ошондой эле мындай көргөзмөлөрдү Кыргызстандын аймагында өткөрүү перспективаларын карап чыгышты.
Кытай тарап Кыргызстанда Борбор Азия өлкөлөрү үчүн айыл чарба техникасынын көргөзмөлөрүн өткөрүүчү регионалдык борбор түзүү мүмкүнчүлүгүн сунуштады. Бул демилге аймактагы өлкөлөрдүн тажрыйба алмашуусуна жана заманбап техникаларды жайылтууга өбөлгө түзмөк.
Мындан тышкары, кытай делегациясы Кыргызстанда айыл чарба техникасын чогултуучу завод курууга кызыкдар экенин билдирди. Бул долбоор ишке ашса, айыл чарба тармагын механизациялоого, жаңы жумуш орундарын түзүүгө жана инвестиция тартууга шарт түзүлөрү белгиленди.
