“Кыргызтест” мекемесинин базасында эл аралык компьютердик тесттин пункту ачылды
Кече, 30-январда, Президентке караштуу Мамлекеттик тил жана тил саясаты боюнча улуттук комиссияга караштуу “Кыргызтест” мамлекеттик мекемесинин базасында эл аралык компьютердик тест пунктунун салтанаттуу ачылышы болду.
Ага Президенттин Администрациясынын, Министрлер Кабинетинин, Жогорку Кеңештин, National Educational Network (NEN) эл аралык компаниясынын, Улуттук илимдер академиясынын, Президентке караштуу Мамлекеттик тил жана тил саясаты боюнча улуттук комиссиясынын өкүлдөрү катышышты.
Иш-чаранын жүрүшүндө мамкатчы Арслан Койчиев “Кыргызтест” мамлекеттик мекемесинин базасында эл аралык компьютердик тест пунктунун ачылышы мамлекеттик тил саясатын ишке ашыруудагы маанилүү кадам экенин белгиледи.
Иш-чаранын алкагында эл аралык компьютердик тест пунктунун ишмердүүлүгү, анын техникалык мүмкүнчүлүктөрү жана эл аралык кызматташтыктын алкагындагы негизги багыттары жөнүндө маалымат берилди. Ошондой эле катышуучулар тесттен өтүү процесси менен жакындан таанышып чыгышты.
“Кыргызтест” мамлекеттик мекемесинин базасында ачылган эл аралык компьютердик тест пункту жарандарга заманбап талаптарга жооп берген тестирлөө кызматтарын көрсөтүүгө, ошондой эле мамлекеттик жана эл аралык деңгээлде таанылган баалоо механизмдерин ишке ашырууга багытталган.
