Улуттук онкология борбору толук кандуу иштеш үчүн 4,5 млрд сом керек
Акыйкатчы институту Улуттук онкология жана гематология борборунда (УОГБ) жана УОГБнун балдар онкология бөлүмүндө жүргүзүлгөн мониторингдин жыйынтыгы боюнча онкологиялык жардам көрсөтүүдө системалуу көйгөйлөр бар экенин билдирип, мамлекеттик органдарды жарандардын ден соолукту сактоого болгон конституциялык укугун камсыздоого чакырды.
Акыйкатчынын маалыматына ылайык, онкологиялык кызматтын каржылык камсыздалышы реалдуу муктаждыктарга жооп бербейт. Борбордун толук кандуу иштеши үчүн 4,5 млрд сом талап кылынат. Ошол эле учурда, 2024-жылы каржылоо 176 млн сомду, ал эми 2025-жылы болгону 800 млн сомду түзгөн.
Омбудсмен институту дары-дармек менен камсыздоо маселесине өзгөчө көңүл бурду. Мониторинг учурунда ооруканада 80 аталыштагы өмүр үчүн зарыл болгон дары-дармектер жетишсиз экени аныкталган. Онкологиялык кызматты дары-дармек менен толук камсыз кылуу үчүн кеминде 2,5 млрд сом керек. Институт бул тартыштыкты жеткирүүлөрдүн кечеңдеши жана "Кыргызфармация" мамлекеттик ишканасы тарабынан жетишсиз сатып алуулар менен байланыштырды.
Мониторинг ошондой эле нур терапиясы жана медициналык жабдуулар боюнча олуттуу көйгөйлөрдү аныктады. Акыйкатчынын маалыматына ылайык, 2025-жылдын август айында эки линиялык ылдамдаткычтын иштен чыгышына байланыштуу 34 бейтап нур терапиясын баштоону күтүп турган. Дарылоо ошол мезгилде эскирген “Бабатрон” аппараты аркылуу гана жүргүзүлгөн.
Омбудсмен институту белгилегендей, учурда өлкөдө линиялык ылдамдаткычтар Бишкек шаарында гана бар. Эл аралык стандарттарга ылайык, калкы болжол менен 7 млн адамды түзгөн өлкө үчүн кеминде 20 даанамындай аппарат талап кылынат.
