2026-жылы Бишкек шаарында жаңы 20 мектеп салынат
КРнын Президенти Садыр Жапаровдун тапшырмасына ылайык, 2026-жылы Бишкек шаары боюнча жаңы 20 мектеп салынат. Мындай билдирүүнү Курулуш, архитектура жана турак жай-коммуналдык чарба министрлигинен кабарлашты.
Кече, 31-январда Курулуш, архитектура жана турак жай-коммуналдык чарба министри Нурдан Орунтаев тиешелүү департаменттин жетекчилери менен борбор калаада курула турган 20 мектептин долбоору жана курулуш аянттары менен таанышып чыкты.
Алардын бири борбор калаадагы Дордой конушунда жайгашкан №94 орто билим берүү мектебинин жанына жаңы окуу корпусу курулмакчы. Долбоорго ылайык, заманбап бардык шарттары менен 3 кабаттуу окуу корпусу салынат. Жакын арада курулуштун алгачкы этабы башталат.
Мындан сырткары Октябрь районуна караштуу Кара-Жыгач конушундагы №91 орто билим берүү мектебинин жанына жаңы окуу корпусу курулууда. Министр аталган объекттин курулуш аянты жана долбоордук документтери менен таанышып, департаменттин жетекчилерине тиешелүү тапшырмаларды берди.
Борбор калаадагы Свердлов районунун Сеченов көчөсүндө жайгашкан №46 орто мектептин жанына дагы жаңы окуу корпусу курулмакчы. Жакында анын дагы алгачкы курулуш этаптары башталганы турат.
Белгилей кетсек, курулуш объектилер республикалык бюджеттин эсебинен каржыланып, Курулуш министрлиги тарабынан ишке ашырылууда.
