Мечитте уурулук кылган 2008-жылкы жигит кармалды
Бишкек шаарынын Ички иштер башкы башкармалыгынын кызматкерлери мечиттерден уурулук кылууга адистешкен шектүүнү кармашты. Бишкек шаарынын ИИББнын Басма сөз кызматынан маалымдагандай, бул окуя 2026-жылдын 7-январында Бишкек шаарынын Свердлов районунунда катталган.
ИИБна Б.А. аттуу жаран жазуу жүзүндө арыз менен кайрылып, белгисиз адамга карата чара көрүп берүүнү суранган.
Арызда ошол эле күнү «Дордой» базарынын аймагында жайгашкан мечитте намаз окуп жаткан учурда белгисиз адам жашыруун түрдө: акча салынган капчык, «iPhone» үлгүсүндөгү уюлдук телефон жана арыз ээсинин жеке буюмдарын уурдап кеткендиги көрсөтүлгөн. Андан соң кылмышкер белгисиз багытка изин суутуп кеткен.
Бул факты боюнча райондук башкармалыктын тергөө кызматы Кыргыз Республикасынын Кылмыш-жаза кодексинин 205-беренеси (уурулук) менен кылмыш ишин козгоду.
Тергөөнүн жана ыкчам-издөө иш-чараларынын жүрүшүндө мурда бир нече жолу кылмыш жоопкерчилигине тартылган, 2008-жылы туулган А.С.ны кармап, милиция бөлүмүнө жеткиришкен. Алдын ала маалыматтарга ылайык, ал мечиттерден уурулук кылууга адистешкен.
Тергөөнүн жүрүшүндө шектүү кылмыш жолу менен алынган уюлдук телефонду «Ош базарынын» аймагында 3 миң сомго сатып жибергенин, ал акчаны жеке муктаждыктарына коротконун билдирген. Учурда тергөө иштери улантылууда, ошондой эле анын Бишкек шаарынын аймагында ушул сыяктуу башка кылмыштарга тиешеси бар-жогу текшерилүүдө.
Аталган шектүүнүн мыйзамсыз аракеттеринен жабыркаган жарандар же кандайдыр бир маалыматка ээ болгон адамдар төмөнкү телефондор аркылуу кайрыла алышат: 0999 15-07-36 же 102.
