Бишкек шаарында опузалап, акча талап кылууга шектүү жаран кармалды

2026-жылдын 19-январында Бишкек шаарынын Октябрь районунун ИИБна Б.Д. аттуу жаран жазуу түрүндө арыз менен кайрылып, белгисиз адамдар ар кандай жолдор менен коркутуп, анын сүйлөшкөн кызынын болжолдуу карызы бар деген шылтоо менен орус рубли өлчөмүндө 150 миң сом акча талап кылып жаткандыгын билдирген.

Бишкек шаарынын ИИББнын Басма сөз кызматынын маалыматына караганда, аталган факты боюнча КРнын Кылмыш-жаза кодексинин 208-беренесинин 1-бөлүгү (опузалап талап кылуу) менен кылмыш иши козголгон. Жүргүзүлгөн ыкчам-тергөө иш-чараларынын жүрүшүндө бул кылмышка 1994-жылы туулган Ч.Т. тиешеси бар экендиги аныкталып, шектүү жабырлануучудан опузалап талап кылынган 80 миң сом акча каражатын алып жаткан учурда кармалган.

Кармоодон кийин шектүү Ч.Т. Бишкек шаарынын Октябрь районунун ИИБнын Тергөө кызматына жеткирилип, КРнын Жазык-процесстик кодексинин 96-беренесине ылайык Бишкек шаардык ИИББнын убактылуу кармоочу жайына камакка алынган. Учурда кылмыш иши боюнча ар тараптуу тергөө амалдары жүргүзүлүүдө.