Коргоо министрлиги альтернативдик кызмат төлөмүн 1,5 эсеге көбөйтүүнү сунуштады
Коргоо министрлиги альтернативдик кызмат үчүн төлөнүүчү жыйымдардын өлчөмүн 1,5 эсеге көбөйтүүнү сунуштап жатканын Жогорку Кеңештин депутаты Дастан Бекешев өзүнүн Telegram-каналында билдирди.
Анын айтымында, мындай кадамга барууга болбойт. "Бул жакыр жарандар үчүн абдан оор болот. Адатта, кандай гана баа жогорулабасын, ал биринчи кезекте алардын капчыгына сокку урат", — деди эл өкүлү.
Буга чейин маалымдалгандай, үй-бүлөлүк жагдайларына байланыштуу альтернативдик кызмат өтөгөн жарандар үчүн төлөм 18 миң сомду, ал эми саламаттыгына байланыштуу чектөөлөрү бар деп табылган жарандар үчүн 25 миң сомду түзөт. Мыйзам долбоорунда бул суммаларды тиешелүүлүгүнө жараша 25 миң жана 50 миң сомго чейин жогорулатуу сунушталууда.
Ошондой эле курал колдонууга жана Куралдуу күчтөрдө кызмат өтөөгө тыюу салган диний уюмдарда каттоодо турган жарандар үчүн альтернативдик кызмат акысынын өлчөмүн 25 миң сомдон 50 миң сомго чейин көбөйтүү каралган.
Коргоо министрлигинин маалыматына ылайык, учурдагы эсептик көрсөткүчтөр 2017-жылы бекитилген. Жаңы төлөм өлчөмдөрүн азыркы экономикалык өсүштү жана инфляцияны эске алуу менен өзгөртүү сунушталууда.
