Кызыл-Кыяда мыйзам бузган курулушка 200 миң сом айып салынды
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, өлкө аймагындагы курулуш объектилерине карата рейддик текшерүүлөр улантылууда. Бул тууралуу Курулуш министрлигинен билдиришти.
Анын алкагында Мамлекеттик архитектура-курулуш контролдоо департаментине караштуу Баткен региондук башкармалыгынын инспекторлору Кызыл-Кыя шаарынын Ленин көчөсүндө курулуп жаткан 7 кабаттуу турак үйдү текшерип, техникалык коопсуздук талаптарынын сакталбагандыгын аныкташты.
Текшерүүнүн жыйынтыгында курулуш иштерин жүргүзүп жаткан “Золотой Квадрат” ЖЧКга Кыргыз Республикасынын "Укук бузуулар жөнүндө" кодексине ылайык акт түзүлүп, 200 миң сом өлчөмүндө айып пул салынды жана расмий эскертүү берилди.
Учурда аталган объект боюнча текшерүү иштери улантылууда.
Министрлик курулуш тармагында иш алып барган бардык уюмдарды жана жеке жактарды мыйзам талаптарын, курулуш нормаларын жана коопсуздук эрежелерин так сактоого чакырат.
