Россиянын "кара тизмесинде" 91 миң кыргызстандык бар
Жогорку Кеңештин депутаты Алтынбек Кылычбаев эл аралык иштер боюнча комитеттин жыйынында Россиянын Миграция кызматынын "кара тизмесинде" канча кыргызстандык бар экенин сурады.
Эмгек, социалдык камсыздоо жана миграция министри Канат Сагынбаев учурда 91 миң кыргызстандык ушул тизменин ичинде экенин билдирди.
Депутат ошондой эле, айрым жарандардын бузган эрежелери "жөнөкөй" болуп эсептелген учурда маселени жөнгө салуу боюнча кандай иштер жүрүп жатканына кызыкты.
Министрдин айтымында, бул боюнча түнкүсүн-түнкүдөй туруктуу иштер жүргүзүлүп, айрым учурларда макулдашууга жетишкен учурлар болот.
"Биз ЕЭКтин мүчөлөрүбүз, бирок уюм чегиндеги айрым макулдашуулар сакталбай келет. Мындай кызматташтык бизге керекпи? Биз мигранттардын маселесин чечүү үчүн бириктик", — деди Кылычбаев.
Сагынбаев бул маселелер ЕЭКтин алкагында дайыма карала турганын айтты жана Президент Садыр Жапаровдун Владимир Путин менен жолугушуусунда да бул маселе көтөрүлгөнүн кошумчалады. "Ар бир учурда биз бул тууралуу айтып келебиз. Жакында мен Россияга барып, кесиптешим менен жолугушам, анда дагы кыргыз мигранттарынын маселеси талкууланат", — деди министр.
Ошондой эле министр Россияда миграциялык эсепте 341 миң 91 кыргызстандык катталганын кошумчалады.
