Эмгек министри Ош жана Баткенде социалдык кызматтардын сапатын текшерди
Эмгек, социалдык камсыздоо жана миграция министри Канат Сагынбаев Ош жана Баткен облустарына жумуш сапары менен барып, министрликтин аймактык бөлүмдөрүнүн ишмердүүлүгү менен таанышты. Бул тууралуу ведомстводон билдиришти.
Иш сапарынын алкагында министр мамлекеттик кызмат көрсөтүүлөрдүн сапаты жана жеткиликтүүлүгү, ошондой эле жер-жерлердеги кызматкерлердин иши боюнча маалымат алды. Ал Кара-Суу, Ноокат, Кадамжай жана Лейлек райондорунда болуп, райондук башкармалыктардын жетекчилери жана адистери менен жолугушууларды өткөрдү.
Жолугушууларда министр калкка көрсөтүлүп жаткан кызматтардын сапатын жогорулатууга өзгөчө көңүл буруп, бир катар тапшырмаларды койду. Айрыкча балалуу үй-бүлөлөр жана майыптуулугу бар жарандар сыяктуу аярлуу катмарлар менен жекече иштөөнү күчөтүү, жарандардын кайрылууларын өз убагында кароо жана тейлөө маданиятын жогорулатуу талап кылынды.
Мындан тышкары, жергиликтүү өз алдынча башкаруу органдары жана башка мамлекеттик түзүмдөр менен өз ара аракеттенүүнү активдештирүү, балдардын укуктарын коргоо жана калкты социалдык колдоо боюнча алдын алуу жана түшүндүрүү иштерин күчөтүү зарылдыгы белгиленди.
