Кадамжайда фермерлерди тейлөө борбору ачылды
Баткен облусунун Кадамжай шаарында фермерлер үчүн жаңы тейлөө борбору ишке кирди. Борбор райондук мамлекеттик администрациянын биринчи кабатында жайгашып, аймактагы дыйкандарга жана фермерлерге комплекстүү кызмат көрсөтүүгө багытталган.
Жаңы борбор аркылуу фермерлер айыл чарба техникаларын ижарага алуу, сапаттуу үрөндөр боюнча маалымат алуу, асыл тукум мал чарбачылыгын өнүктүрүү жана өндүрүлгөн продукцияны рынокко чыгаруу маселелери боюнча кеңеш ала алышат. Фермерлерди кабыл алуу шейшемби жана бейшемби күндөрү жүргүзүлөт.
Бул демилге Суу ресурстары, айыл чарба жана кайра иштетүү өнөр жайы министри Бакыт Төрөбаевдин сунушу менен ишке ашырылган. Максат — фермерлерге бардык керектүү маалыматтарды бир жерден жеткиликтүү кылып, аймактагы айыл чарбасын колдоо.
