Корея Бишкек менен Чүйдүн абасын жакшыртууга 10 млн доллар бөлөт
2026-2028-жылдары Бишкек шаарында жана Чүй облусунда абанын сапатын жакшыртууга багытталган ири экологиялык долбоор ишке ашырылат. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, 2-февралда Жаратылыш ресурстары, экология жана техникалык көзөмөл министри Машиев М.А. жана министрдин орун басары Раимкулова А.К. Корея Республикасынын Эл аралык кызматташтык агенттигинин (KOICA) делегациясы менен жолугушуу өткөрүштү.
Жолугушуунун жүрүшүндө Кыргызстанда абанын сапатын жакшыртуу боюнча долбоорду ишке ашыруу маселелери талкууланды. Долбоор Корея Республикасынын Өкмөтү тарабынан 10 млн АКШ долларына чейин кайтарымсыз жардам көрсөтүүнү карайт.
Аталган демилге абага зыяндуу заттардын бөлүнүп чыгышын азайтууга, абанын сапатын башкаруунун комплекстүү планын иштеп чыгууга, ошондой эле мамлекеттик билим берүү мекемелеринде экологиялык жактан таза жылытуу системаларын киргизүүгө багытталган.
