Арчалы айылында балдар үчүн заманбап реабилитациялык шаарча курулат
Балдарга реабилитациялык жардам көрсөтүү системасын өнүктүрүү жана адистештирилген медициналык кызматтардын жеткиликтүүлүгүн жогорулатуу максатында Президент Садыр Жапаровдун тапшырмасы боюнча иштеп жаткан "Максат" реабилитациялык борборунун базасында реабилитология боюнча билим берүүчү жана илимий-усулдук функциялары бар заманбап реабилитациялык шаарчаны долбоорлоо жана куруу пландалууда. Бул тууралуу Саламаттык сактоо министрлигинен билдиришти.
Долбоорду ишке ашырууга даярдык көрүүнүн алкагында саламаттык сактоо министри Каныбек Досмамбетов "Максат" борборуна барып, анын материалдык-техникалык базасы, балдарга көрсөтүлүп жаткан жардамдын шарттары жана инфраструктураны мындан ары өнүктүрүүгө арналган аймак менен таанышты.
Маалыматка ылайык, шаарчада церебралдык шал оорусу, аутизм спектринин бузулуусу, Даун синдрому жана өнүгүүнүн кечигүүсү менен жабыркаган балдарга комплекстүү жардам көрсөтүү каралган.
Ал эми курамына стационардык, амбулатордук жана күндүзгү реабилитация борборлору, коррекциялык борборлор, 150 орундуу БЦШО борбору, ата-энелер жана кызматкерлер үчүн жатакана, ошондой эле билим берүү жана усулдук блок кирет.
Реабилитация залдары, бассейн, физикалык терапия, массаж, логопедия, эрготерапия, психология кабинеттери, ачык оюн аянтчалары жана ат менен өз ара аракеттенүүгө негизделген иппотерапия элементтери каралган. Ишмердүүлүк далилдүү медицина, көп тармактуу ыкма жана үй-бүлөнүн активдүү катышуусу менен түзүлгөн индивидуалдык программаларга негизделет.
