ЕАЭБде карантиндик фитосанитардык көзөмөл тартибине өзгөртүүлөр киргизилди
Евразия экономикалык комиссиясынын (ЕЭК) Кеңеши Евразия экономикалык бирлигинин (ЕАЭБ) аймагында карантиндик фитосанитардык көзөмөл жүргүзүү тартиби жөнүндө Токтомго өзгөртүүлөрдү киргизди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Кабыл алынган өзгөртүүлөр рыноктун ак ниет катышуучулары үчүн ыңгайлуу шарттарды түзүүгө, ошондой эле карантиндик фитосанитардык көзөмөл жол-жоболорунун ачыктыгын жана натыйжалуулугун жогорулатууга багытталган.
Атап айтканда, фитосанитардык сертификаттарда карантиндик продукцияны алуучуларды туура эмес көрсөтүү фактыларын алдын алуу боюнча чаралар каралды. Бул Бирликтин аймагында продукциянын кыймылын так көзөмөлдөөгө жана мыйзам бузууларды азайтууга мүмкүндүк берет.
Ошондой эле өзгөртүүлөр ЕАЭБдин аймагында карантиндик фитосанитардык коопсуздуктун деңгээлин жогорулатууга, айыл чарба өндүрүшүн коргоого жана карантиндик объекттердин жайылышын алдын алууга багытталган.
