Ош облусунда курулуп жаткан социалдык объектилерде кемчиликтер аныкталды
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, өлкө аймагындагы курулуш объектилерине карата рейддик иш-чаралар улантылууда.
Министрликке караштуу Мамлекеттик архитектура-курулуш контролдоо департаментинин Ош региондук башкармалыгынын инспекторлору Ош облусунда курулуп жаткан социалдык объектилердин курулуш иштерине көзөмөл жүргүзүштү.
Рейддин жүрүшүндө Алай районунун Жаңы-Алай айылында “Азия Курулуш Компани” ЖЧКсы куруп жаткан 120 орундуу бала бакча, Араван районунун Жар-Кыштак айылында “Байел” ЖЧКсы куруп жаткан А.Орозов атындагы мектептин 100 орундуу кошумча окуу корпусу, Өзгөн шаарында Курманжан-Датка мектебинин жанында “Юг-Достук” ЖЧКсы куруп жаткан бала бакча, ошондой эле Өзгөн шаарында “Арх строй инженеринг” ЖЧКсы куруп жаткан Бабур мектебинин аймагындагы спорт зал текшерилди.
Текшерүүнүн жыйынтыгында бир катар кемчиликтер аныкталып, курулуш жүргүзгөн компанияларга жазуу түрүндө эскертүүлөр жана көрсөтмөлөр берилди. Ошондой эле курулуш иштерин бекитилген долбоорго ылайык жүргүзүү жана техникалык коопсуздук талаптарын так сактоо зарылдыгы эскертилди.
