Кыргызстан менен Пакистан агрардык кызматташтыкты жаңы деңгээлге чыгарат
Суу ресурстары, айыл чарба жана кайра иштетүү өнөр жайы министрлигинде вице-министр Бектен Бекболотовдун Пакистан Ислам Республикасынын Кыргыз Республикасындагы Элчиси Алтамаш Вазир Хан менен жолугушуусу өттү. Бул тууралуу ведомстводон билдиришти.
Жолугушууда тараптар айыл чарба, соода жана халяль-индустрия багыттарындагы эки тараптуу кызматташтыктын учурдагы абалын жана келечегин талкуулашты. Өзгөчө көңүл Кыргызстандык буурчакты Пакистан рыногуна экспорттоону кеңейтүүгө жана айыл чарба продукцияларынын өз ара соодасын өнүктүрүүгө бурулду.
Пакистан тарап сүттү кайра иштетүү жана сүт өндүрүшүн өнүктүрүү боюнча тажрыйба алмашууга кызыкдар экенин билдирди. Ошондой эле Пакистан Техникалык жардам программасы (PTAP) алкагында айыл чарба жана токой чарбасында кыска жана узак мөөнөттүү окуу курстарын сунуштады.
Жолугушуунун жыйынтыгында тараптар жооптуу байланыштуу адамдарды дайындоо, техникалык эксперттердин биргелешкен жумушчу тобун түзүү, бал жана кургатылган жемиштер менен сооданы өнүктүрүү, биргелешкен ишканаларды илгерилетүү жана эксперттик консультацияларды улантуу боюнча макулдашышты.
