Өзгөндө үч милиция кызматкери кылмышка шектелип кармалды

Ош облусунун Өзгөн РИИБинин үч кызматкери кылмышка шектелип кармалганын УКМКдан билдиришти.

Маалыматка ылайык, милиция кызматкери З.У.А. жашы жете электер боюнча инспекторлор Н.А.Н. жана А.У.А. менен биргеликте 2008-жылы туулган Т.А.У. аттуу жашы жете элек кызды айрым жарандар менен жыныстык катнашка барууга азгырып, андан акча талап кылуу боюнча кылмыштуу схеманы уюштурушкан.

Аталган фактынын негизинде УКМКнын Ош шаары жана Ош облусу боюнча башкы башкармалыгынын Тергөө башкармалыгы кылмыш ишин козгоп, Ички иштер министрлиги менен биргеликте Өзгөн райондук ички иштер бөлүмүнүн үч кызматкерин кармаган. Алар УКМКнын убактылуу кармоочу жайына камакка алынган.

Тергөөнүн жүрүшүндө кармалган кызматкерлер өздөрүнүн мыйзамсыз аракеттерин моюнга алышкан. Учурда тергөө иштери уланууда.