Бишкекте жаңыланган Баластан бала бакчасы ачылды
Бишкек шаарындагы "Красный Строитель" конушунда жайгашкан №67 Баластан бала бакчасы капиталдык оңдоп-түзөөдөн кийин салтанаттуу ачылды. Бул тууралуу муниципалитеттен билдиришти.
Салтанаттуу аземге Министрлер Кабинетинин Төрагасынын орун басары Эдил Байсалов, Бишкек шаарынын мэри Айбек Джунушалиев, Билим берүү министри Догдуркул Кендирбаева, Бишкек шаардык кеңешинин төрагасынын орун басары Жылдызбек Абдраимов, мэриянын өкүлдөрү жана райондун тургундары катышты.
Мэр Айбек Джунушалиев балдар бакчасынын максаты — балдарды окутуу жана өнүктүрүү экенин белгилеп, имаратта коопсуз жана сапаттуу шарттар түзүлгөндүгүн айтты.
Бала бакча 1984-жылы курулуп, 1991-жылга чейин иштеген. 2019-жылы муниципалдык менчикке кайтарылып, 2022-жылы 140 орундуу бала бакча катары ишке берилген. Капиталдык оңдоп-түзөө иштеринин аркасында бала бакчанын сыйымдуулугу 140тан 246 балага көбөйтүлдү. Имараттын жалпы аянты 1488,4 чарчы метр, эки кабаттуу имарат толугу менен оңдолду, алты оюн аянтчасы орнотулду.
Долбоор Бишкек шаарынын мэриясынын Капиталдык курулуш башкармалыгы тарабынан мектепке чейинки билим берүүнү өнүктүрүү программасынын алкагында ишке ашырылды. Подрядчы катары "Рим и Ко" ЖЧКсы иш алып барды.
