"Үмүт үйүнө" 2 млн сомдон ашык камсыздандыруу сертификаты тапшырылды
11-февралда Бишкек шаарынын мэриясында "Үмүт үйү" социалдык стационардык мекемесинин директоруна 2 020 311,73 сом өлчөмүндөгү камсыздандыруу сертификаты тапшырылды. Бул тууралуу Бишкек мэриясынан билдиришти.
Сертификатты Бишкек шаарынын мэри Айбек Джунушалиев жана "Мамлекеттик камсыздандыруу уюму" ААКсынын Башкармалыгынын төрагасы Элдияр Калдарбеков тапшырышты.
Мэр мүлктү өз убагында камсыздандыруунун маанилүүлүгүн белгилеп, борбор калаанын коопсуздугун камсыз кылуу боюнча иштер улантыларын билдирди.
2025-жылы Бишкек шаарында 65 989 турак жай, 49 308 транспорт каражаты жана 587 муниципалдык объект камсыздандырылган.
Мэриянын тапшырмасына ылайык, социалдык өнүгүү системасына кирген бардык мекемелер "Мамлекеттик камсыздандыруу уюму" ААКсында камсыздандырылган. Алардын катарында "Үмүт үйү" да бар.
Эскерте кетсек, 2026-жылдын 6-январында мекеменин паллиативдик бөлүмүндө өрт чыгып, анын кесепетинен эки адам каза болгон.
"Үмүт үйү" 2023-жылдын апрелинен тартып Бишкек шаарынын мэриясынын Социалдык өнүгүү департаментинин карамагында иш алып барат.
