Тынчтык жөнүндө мыйзам долбоорун Жогорку Кеңеш биринчи окууда кабыл алды
КРнын айрым мыйзам актыларына, укук бузуулар жөнүндөгү кодексине, укук бузууларды алдын алуу негиздери жана тынчтык жөнүндө мыйзамдарга өзгөртүүлөрдү киргизүү тууралуу мыйзамынын долбоору бүгүн ЖКтин отурумунда, биринчи окууда жактырылды.
Бул боюнча КРнын ИИМнин орун басары Октябрь Урмамбетов баяндама жасап, 2025-жыл ичинде 102 байланыш телефон аркылуу ИИМге 164 432 ар кандай чалуу келип түшкөн. Анын ичинен ызы чуу боюнча 5705 чалуу катталган.
“Бүгүнкү күндө КРнын укук бузуулар кодексинин 82-беренесин кароо укугу ушул кодекстин 465-беренеси менен бир эле ыйгарым органга жүктөлгөн. Тагыраагы Саламаттыкты сактоо чөйрөөсүндөгү ыйгарым укуктуу органга. Тажрыйба көрсөткөндөй чалуулар түнкү убакта катталып жаткандыгын эске алуу менен ушул мыйзам долбоору сунушталууда. Ага ылайык, жарандардын тынчтыкка болгон укуктарын коргоо максатында мыйзам долбоору менен Саламаттыкты Сактоо чөйрөсүнө ыйгарым укуктуу органына, ички иштер органдарыына жана жергиликтуу өз алдынча башкаруу органдарына тиешелүү алдын ала ишчараларын жүргүзүүгө укуктарды берүү сунушталууда” – деди Урмамбетов.
Ички иштер министринин орун басары Октябрь Урмамбетов белгилегендей, мыйзам долбоору жарандардын укуктарын коргоо жана алардын ден соолугун белгиленген ченемдерден ашкан үн басымынын жана ызы-чуунун зыяндуу таасиринен сактоо максатында иштелип чыккан.
Мыйзамдын долбоорун талкуулоодо, эл өкүлү Махабат Мавлянова баланын ыйлагандыгы –адамдык фактор экенин белгилеп, токтом чыгарууда эске алууну сунуштады.
Өз кезегинде, ИИМ министринин орун басары, бала ыйлаган жана андан башка ар кандай шарттар Министрлер кабинетинин токтому менен көрсөтүлө тургандыгын жана аталган мыйзам колдонулуп жаткан башка мыйзамдарга жана эл аралык келишимдерге карама-каршы келбестигин билдирди.
