Ош шаарында ишкерден опузалап акча талап кылган жаран кармалды

Өздөрүн милиция кызматкерлери катары тааныштырышкан белгисиз үч жаран Ош шаарындагы укалоо салондордун бирине келип, салон ээсине кызматтык күбөлүгүн көрсөтпөстөн, тинтүү иштерин жүргүзүшүп, салон ээсине орой мамиле жасашкан.

ИИМдин Басма сөз кызматынан билдиришкендей, шектүүлөр салон ээсинен 32 000 сом накталай акча алышып, кошумча акча талап кылышкан. Кийинчерээк, шектүүлөрдүн бири өзүн “Марсель” деп тааныштырган жаран дагы 15 000 сом алып, андагы соң калкалап турууну убадалап жума сайын 10 000 сомдон электрондук капчыгына котортуп турган. Жалпысынан жабырлануучудан 77 000 сом алынган.

Бул факт боюнча Кылмыш-жаза кодексинин 208-беренесинин негизинде (Опузалап талап кылуу) кылмыш иши козголуп, ИИМ тарабынан жүргүзүлгөн ыкчам-иликтөө иш-чараларынын жүрүшүндө шектүүлөрдүн бири 1993-жылы туулган К. уулу Н. кезектеги 10 000 сомду алуу учурунда кармалган. Тергөө амалдарынын жүргүзүү учурунда анын ички иштер органдарына эч кандай тиешеси жоктугу аныкталды. Ошондой эле ал ушул сыяктуу бир нече кылмышты жасоого шектүүлүүдө. К. улуу Н. Ош ШИИБдин Убактылуу кармоочу жайына киргизилген.

Дагы эки шектүүлөргө карата ыкчам-иликтөө иш-чаралары жүргүзүлүп жатат.