Аксы районунда 5 млн сомдон ашык каржылык бузуулар аныкталды
КРнын Эсептөө палатасы Жалал-Абад облусунун Аксы районундагы жергиликтүү өз алдынча башкаруу органдарына шайкештик аудит жүргүздү. Текшерүү 2024-жылдын 1-январынан 31-декабрына чейин уланып, Аксы райондук мамлекеттик администрациясы, Аксы районунун өнүктүрүү фондусу, Финансы министрлигинин Аксы финансы башкармалыгы, Кербен шаардык мэриясы, Кербен шаардык мэриясынын алдындагы “Кербен Тазалык”, “Кербен Таза суу”, “Мин-Булак Таза суу” муниципалдык ишканалары, айыл өкмөттөрү жана айыл өкмөттөрү алдындагы муниципалдык ишканалары камтылды.
Эспетөө палатасынын маалыматына караганда, аудиттин жыйынтыгы боюнча, жалпысынан 5005,8 миң сомдук каржылык бузуулар аныкталды. Эң ири бузуулар негизги каражаттарды эсепке алуу тартибин бузуу - 2434,0 миң сом жана бюджетке милдеттүү төлөмдөрдүн толук жана өз убагында чегерилбеши - 1714,4 миң сом менен байланыштуу болгон. Ошондой эле эмгек акы, командировкалык чыгымдар жана дебитордук карыздар боюнча да мыйзам бузуулар аныкталган.
Жыйынтыгында тиешелүү жетекчилерге мыйзам бузууларды жоюу боюнча сунуштамалар жана жазма буйруктар жөнөтүлдү. Мындан тышкары, маалымат жергиликтүү кеңештерге жана Президенттин Жалал-Абад облусундагы өкүлүнө берилди.
