Альпинист Наталья Наговицинаны издөө операциясына 2 млн доллар керек
Жеңиш чокусунда калып калган альпинист тууралуу издөө иштерин Россиянын альпинизм федерациясы 2 миллион доллардан жогору баалады.
Кыргызстандын тоолорунда жоголгон альпинист Наталья Наговицинаны издөө операциясы 2 млн доллардан ашык каражатты талап кылганын федерациянын вице-президенти Александр Пятницин билдирди.
Эске салсак, Наталья Наговицина Жеңиш чокусуна чыккан соң, деңиз деңгээлинен болжол менен 7,2 миң метр бийиктикте бутун сындырып алган. Башка альпинисттер аны куткарууга аракет кылышкан, бирок аба ырайынын оор шарттарынан улам жардам бере алышкан эмес. Алардын бири — италиялык Лука Синигалья — 15-августта үшүп каза болгон.
Буга чейин федерация издөө операциясын кайра баштай албай турганын жана баштабай турганын билдирген.
"Бул операция 2–3 млн доллар турат. Балким, тобокелге барууга даяр адам, мисалы туугандары табылса... Бирок мындай издөө иштеринде каза болуу коркунучу абдан жогору", — деди Пятницин.
Анын айтымында, "мындай бийик тоо... космос сыяктуу эле".
2025-жылдын 12-августунда Наталья Наговицина Жеңиш чокусунда калып калган. Ал маршрутта жүрүп бутун сындырып алып, түшө албай калган. Баары аны куткарууга үмүт кылышкан. 23-августта Кыргызстандын Өзгөчө кырдаалдар министрлиги аба ырайынын начардыгына байланыштуу куткаруу операциясы токтотулганын билдирген. Айрым альпинисттер аны табуу аракетин улантышкан, бирок аба ырайы мүмкүндүк берген эмес. 2-сентябрда Кыргызстандын альпинизм жана спорттук аскага чыгуу федерациясынын президенти Эдуард Кубатов бардык издөө иштеринин токтотулганын расмий билдирген.
