Парламент комитети минкаб төрагасынын орун басарлыгына Маматкановду жактырды
Жогорку Кеңештин тармактык комитети бүгүнкү жыйынында министрлер кабинетинин төрагасынын орун басары кызматына Улан Маматкановдун талапкерлигин жактырды.
Анын талапкерлиги президент Садыр Жапаров тарабынан сунушталып, Жогорку Кеңештин макулдугун алуу үчүн киргизилген. Комитеттин жыйынында талапкердин өмүр баяны, иш тажрыйбасы боюнча маалымат берилди.
Улан Маматканов Ош облусунун Кара-Суу районуна караштуу Мады айылында туулган. Учурда 43 жашта.
Билими:
- 2004-жылы — Ош мамлекеттик университетинин философия жана башкаруу технологиялары факультетин “мамлекеттик жана муниципалдык башкаруу” адистиги боюнча артыкчылык диплому менен аяктаган.
- 2008-жылы — президентке караштуу Мамлекеттик башкаруу академиясынын “мамлекеттик башкаруу жана жергиликтүү өз алдынча башкаруу” адистиги боюнча магистратурасын бүтүргөн.
Эмгек жолу:
- 2005–2008-жылдары — Эмгек жана социалдык коргоо министрлигинде ар кандай кызматтарда;
- 2007–2008-жылдары — Эмгек жана социалдык өнүктүрүү министри У.Абдуллаеванын кеңешчиси;
- 2009-жылы — вице-премьер-министр У.Абдуллаеванын жардамчысы;
- 2009–2010-жылдары — өкмөт аппаратынын өкмөттүк чечимдерди экспертизалоо бөлүмүнүн эксперти, вице-премьер-министрдин жардамчысы;
- 2010-жылы — эмгек, иш менен камсыз кылуу жана миграция министри А.Рыскулованын жардамчысы;
- 2010–2011-жылдары — Эмгек, иш менен камсыз кылуу жана миграция министрлигинин этникалык кыргыздар жана кайрылмандар менен иштөө бөлүмүнүн башчысы;
- 2011-жылы — социалдык коргоо министри А.Рыскулованын кеңешчиси;
- 2012-жылы — өкмөт аппаратынын уюштуруу-инспектордук иштер жана региондук мониторинг бөлүмүнүн инспектору;
- 2013–2014-жылдары — жеке сектордо;
- 2014–2016-жылдары — президент аппаратынын социалдык саясат бөлүмүнүн эксперти;
- 2016–2018-жылдары — өкмөт аппаратынын социалдык өнүктүрүү бөлүмү;
- 2020–2021-жылдары — эмгек, социалдык камсыздоо жана миграция министринин биринчи орун басары;
- 2021-жылы — Социалдык фонддун төрагасынын орун басары;
- 2021–2026-жылдары — президенттин администрациясында;
- 2026-жылдын 15-апрелинен тарта — министрлер кабинетинин төрагасынын орун басарынын милдетин аткаруучу болуп дайындалган.
