Өзбекстанда шарп оорусуна байланыштуу өзгөчө режим киргизилди
Өзбекстанда 18-апрелден 18-майга чейин мал чарбачылыгы тармагында өзгөчө көзөмөл режими киргизилди. Мындай чечим өлкөнүн Айыл чарба министрлиги жана фермерлер кеңеши тарабынан шарп оорусунун жаңы SAT серотибинин жайылуу коркунучуна байланыштуу кабыл алынды.
Мекемелердин маалыматына ылайык, колдонулуп жаткан вакциналар бул вирус түрүнөн толук коргой албайт.
Жаныбарлардын ден соолугун коргоо боюнча дүйнөлүк уюмдун маалыматына караганда, 2025–2026-жылдары бул оору 48 мамлекетте катталган.
Расмий түрдө Өзбекстанда шарп оорусу каттала элек. Бирок социалдык тармактарда оорулуу мал тууралуу видеолор тарап жатат. Фермерлер жаныбарлар жем жебей калып, андан кийин бир нече күндүн ичинде өлүп жатканын билдиришүүдө.
Аймактагы абал чыңалуу бойдон калууда. Буга чейин оорунун учурлары Кытайда аныкталган, Казакстан чек ара аймактарында шашылыш эмдөө иштерин баштаган, ал эми Россияда 2025-жылдын аягында малды массалык түрдө союу жүргүзүлгөн.
Өзбекстандын бийлиги фермерлерге чарбалардын кире беришине дезинфекциялык тосмолорду орнотууну, сырттан келген адамдардын кирүүсүн чектөөнү жана ветеринардык эрежелерди так сактоону сунуштайт. Мал ээлерин өз алдынча дарылоодон алыс болууга жана алгачкы белгилер — дене табынын көтөрүлүшү, туяктарда жана ооз көңдөйүндө жаралар пайда болгондо — дароо адистерге кайрылууга чакырат.
