Мыйзамсыз психотроптук заттарды жана прекурсорлорду жүгүртүү каналы токтотулду
Бишкек шаарында психотроптук заттардын жана прекурсорлордун мыйзамсыз жүгүртүү каналы токтотулганын Бишкек шаардык ИИББнын басма сөз кызматы билдирди.
Шаардык ИИББнын Баңгизаттарды мыйзамсыз жүгүртүүгө каршы күрөшүү кызматынын кызматкерлери белгисиз жаран Кытайдан психотроптук заттарды жана прекурсорлорду мыйзамсыз ташып келип, аларды интернет-дүкөн аркылуу сатуу, ошондой эле синтетикалык баңгизаттарды даярдоо үчүн колдонуп жаткандыгы тууралуу маалымат алышкан.
Бул факт боюнча Кылмыш-жаза кодексинин 284-беренеси (прекурсорлорду мыйзамсыз даярдоо) менен кылмыш иши козголгон.
Тергөө жана ыкчам-издөө иш-чараларынын жүрүшүндө Курманжан Датка көчөсүндө 1990-жылы туулган А.Э. аттуу жаран кармалган. Аны тинтүү учурунда жана кармалган жерди кароо маалында синтетикалык баңгизаттарды даярдоодо колдонулуучу прекурсорлор — туз кислотасы жана метилпропиофенон табылып, алынган. Жалпы алынган заттардын салмагы 69,9 кг түзгөн.
Азыркы учурда бул иш боюнча Свердлов РИИБнин тергөө кызматы мүмкүн болгон шериктештерди жана сатуу каналдарын аныктоо боюнча бардык керектүү тергөө иш-аракеттерин жүргүзүүдө.
