37 жылдан бери колдонулуп келген жылуулук түтүктөр алмашылууда
Шабдан Баатыр көчөсүндөгү тилкеде жылуулук тармактарын реконструкциялоо иштери жүргүзүлүүдө. Бул тууралуу “Бишкек жылуулук тармагы” ишканасынан билдиришти.
Маалыматка ылайык, бүгүнкү күндө жерди казуу иштери уланууда, ошондой эле демонтаждоо иштери, анын ичинде иштеп жаткан түтүктөрдү чечүү башталды. Иштер пландык режимде жүрүп жатат.
Реконструкциялоонун алкагында түтүктөрдүн диаметрин 900 ммден 1000 ммге чейин чоңойтуу менен алмаштыруу каралган. Тилкенин жалпы узундугу 1080 метрди түзөт.
Жылуулук тармактарынын бул тилкеси 1989-жылы ишке киргизилген. Нормативдик кызмат өтөө мөөнөтү 25 жыл болсо, учурда ал 37 жылдан бери колдонулуп келет. Бул түтүктөрдүн өтө эскирип калгандыгынан кабар берет.
