Угуу мүмкүнчүлүгү чектелген кыргызстандыктар 20 млн сомдон ашык акчага алданышкан
Жогорку Кеңештин депутаты Дастан Бекешев угуу мүмкүнчүлүгү чектелген жарандарга карата бир катар алдамчылык фактылары катталганын билдирди. Анын айтымында, бул иштер боюнча келтирилген зыян 20 миллион сомдон ашат.
Парламентарийдин маалыматына ылайык, угуу мүмкүнчүлүгү чектелген 30дан ашык адам бири-бирине каршы арыз жазып, алар алдамчылык фактылары катары катталган. Сөз 2023–2025-жылдар аралыгындагы окуялар тууралуу болууда.
Депутаттын айтымында, угуу мүмкүнчүлүгү чектелген Казакстандын эки жараны Кыргызстанга келип, турак жайды арзан баада алып берүү сунуштарын киргизишкен. Натыйжада жабырлануучулар акча которуп, ал каражаттар, Бекешевдин айтымында, өлкөдөн сыртка чыгарылып кеткен.
"Алар абдан ишенчээк, укуктук сабаттуулук деңгээлинде көйгөйлөр бар. Жыйынтыгында 20 млн сомдон ашык каражат Казакстанга которулган", — деп белгиледи ал.
Депутат белгилегендей, учурда ортомчулар гана кармалды, алар да угуу мүмкүнчүлүгү чектелген адамдар. Ал эми схеманын уюштуруучулары азырынча жоопкерчиликке тартылган эмес.
Бекешев Кыргыз Республикасынын Ички иштер министрлигине Казакстандын укук коргоо органдары менен биргеликте иликтөө жүргүзүү өтүнүчү менен кайрылды.
Ички иштер министринин орун басары Эркебек Аширходжаев бул багытта иш казак тарап менен биргеликте жүргүзүлөрүн билдирди.
