Мектеп формасы мурдагы талаптар боюнча калат — жумушчу топтун чечими чыкты

Агартуу министрлиги мектеп формасына байланыштуу сунуштарды кароо үчүн түзүлгөн атайын жумушчу топ өз чечимин чыгарды. Ага ылайык, Кыргыз Республикасынын Өкмөтүнүн 2015-жылдын 12-августундагы №572 токтому өзгөртүүсүз күчүндө калат.

Министрликтин маалыматына ылайык, чечим мугалимдердин, ата-энелердин, окуучулардын жана эксперттердин пикирлерин эске алуу менен кабыл алынган.

Буга чейин көпчүлүк ата-энелер балдарына “үстү ачык түстө, асты кочкул түстө” деген талапка ылайык мектеп формасын өз алдынча тандап келишкен. Бул ыкма билим берүү процессинде олуттуу көйгөйлөрдү жараткан эмес.

Кыздар үчүн мектеп формасына классикалык стилдеги блузка, жилет, юбка, шым, көйнөк, фартук жана пиджак кирет. Ал эми балдар үчүн көйнөк, жилет, шым жана пиджак каралган. Форманын негизги түстөрү катары кара, боз, көк жана кочкул кызыл түстөр бекитилген.

Министрлик белгилегендей, бирдиктүү жана токтоо мектеп формасы окуучулардын ортосундагы социалдык айырмачылыкты азайтып, кийим-кечеге байланышкан атаандаштык менен материалдык басымдын алдын алууга жардам берет.