Сел каптаган аймактардын тургундарынын ден соолугу текшерилүүдө
Ош, Жалал-Абад жана Баткен облустарынын бир катар райондорунда катуу жаан-чачынга байланыштуу санитардык-эпидемиологиялык жана медициналык иштер күчөтүлдү. Бул тууралуу Саламаттыкты сактоо министрлигинин басма сөз кызматынан билдиришти.
Маалыматка ылайык, селден жабыркаган райондордо медициналык кызматтар күчөтүлгөн режимде иш алып барууда. Селге кабылган айылдарда үймө-үй кыдыруулар уюштурулуп, көчмө бригадалар тартылды, суунун сапатына көзөмөл жүргүзүлүүдө, жугуштуу оорулардын алдын алуу иштери жүргүзүлүп, жарандык коргонуу органдары жана жергиликтүү бийлик органдары менен өз ара аракеттенүү камсыздалууда.
Баткен облусунда кооптуу аймактардан 35 үй-бүлө эвакуацияланды. Эвакуацияланган жарандар медициналык коштоого алынып, алардын саламаттык абалы көзөмөлдөнүүдө. Медициналык жардам алууга 37 адам кайрылып, алардын бардыгына зарыл жардам көрсөтүлдү, оор учурлар катталган жок.
