Аравандагы селден кийин санитардык-эпидемиологиялык абал көзөмөлдөндү
3-майда Араван районунун Достук айыл аймагынын Маданият, Пахта-Дөбө айылдарында жана Дөбө-Коргон айыл аймагынын Бостон айылында катуу жааган жаандан улам сел жүрүп, 21 турак үйдүн короо-жайын, 10 ажаткананы, 1 мектептин жана 1 бала бакчанын короосун суу каптаган. Бул тууралуу президенттин Ош облусундагы өкүлчүлүгүнөн билдиришти.
Маалыматка ылайык, райондун тиешелүү кызматтары (жергиликтүү бийлик, ӨКМ, жол тейлөө ишканасы, СЭЦ) тарабынан тазалоо иштери ыкчам жүргүзүлүп, 4-майда толугу менен аяктаган. Учурда Маданият айылында ички жолдор, арыктар жана сел каналдары калыбына келтирилүүдө.
Кырсыктын кесепеттерин жоюу жана жугуштуу оорулардын алдын алуу максатында райондук санитардык-эпидемиологиялык кызмат активдүү иш алып барууда. Алар 50 кг ГСА жана 100 даана "Хлорапин" дезинфекциялоочу каражаттарын колдонуп, залалсыздандыруу иш-чараларын жүргүзүштү. Мындан тышкары, 62 турак үй кыдырылып, санитардык-гигиеналык талаптарды сактоо боюнча түшүндүрүү иштери жүргүзүлүүдө.
Суу түтүктөрү жабыркаган эмес. Ичүүчү суунун сапаты текшерилип, бардык чекиттерден алынган үлгүлөр боюнча олуттуу терс белгилер аныкталган жок. Учурда район боюнча эпидемиологиялык абал туруктуу жана көзөмөлдө.
