“Таш-Рабат” кербен сарайынын курулушу боюнча маалымат берилди
Акыркы күндөрү социалдык тармактарда "Таш-Рабат" кербен сарайында жүрүп жаткан иштер боюнча ар кандай талкуулар жүрүп жаткан. Маданият, маалымат жана жаштар саясаты министрлиги бул маалыматтарга расмий комментарий берди.
Министрликтин маалыматына караганда, "Таш-Рабат" архитектуралык эстелиги табигый жана антропогендик таасирлерден улам бузулуу коркунучунда тургандыктан, 2025-жылы реставрациялоо боюнча тендер өткөрүлүп, анын жеңүүчүсү “Юг-Стройсервис” ААКсы болуп аныкталган. Иш-чаралар “Көөнө тарых сырлары” мамлекеттик программасынын алкагында аткарылууда.
Реставрация “Тарыхый-маданий мурастарды коргоо жана пайдалануу жөнүндө” Кыргыз Республикасынын мыйзамына жана эл аралык илимий талаптарга ылайык жүргүзүлүүдө.
“Кыргызреставрация” илимий-изилдөө институту тарабынан атайын илимий долбоор даярдалып, жергиликтүү жана чет өлкөлүк адистердин катышуусунда бир нече илимий кеңешмелер жана жеринен изилдөөлөр өткөрүлгөн.
Тосмо жана чатыр - реставрацияны коргоо үчүн орнотулган убактылуу чаралар деп баса белгилейбиз. Анткени, реставрация иштеринин коопсуздугун камсыз кылуу үчүн:
- эстеликти мал-жандыктардан коргоо максатында айлана тосмолор менен курчалды;жаан-чачындын тийгизген зыянын азайтуу жана адистерге ыңгайлуу шарт түзүү үчүн убактылуу чатыр орнотулду.
- Бул конструкциялар - убактылуу, реставрация аяктаганда алып салынат.
- Иштер толугу менен илимий негизде жүргүзүлүүдө
Ар бир кадам адистердин корутундуларына, лабораториялык изилдөөлөргө жана тарыхый материалдарга таянат. Иштердин максаты - Таш-Рабаттын түпкү тарыхый келбетин сактап калуу, аны өзгөртүү же талкалоо эмес.
