Токтогул суу сактагычынан синтетикалык торлор чыгарылды
Экологиялык жана техникалык көзөмөл кызматынын биоресурстарды контролдоо бөлүмү тарабынан Токтогул суу сактагычы аймагында мыйзамсыз балык уулоочу каражаттарды тазалоо боюнча масштабдуу рейд өткөрүлдү. Рейддин жүрүшүндө суудан жалпысынан 800 метр синтетикалык тор чыгарылды. Бул тууралуу аталган кызматтан билдиришти.
Маалыматка ылайык, мындай синтетикалык торлор суу экосистемасына орду толгус зыян келтирет: балык запастарынын азайышына алып келет, сууда сүзүүчү канаттуулар үчүн өлүмгө айланган тузакка айланат жана жаратылыштагы биологиялык тең салмактуулукту бузат.
Мындан тышкары, Алатай жаратылыш аймагы аймагында мыйзамсыз балык уулоо менен алектенген жаран аныкталып, тиешелүү протокол түзүлдү.
Ошондой эле Кара-Суу көлү аймагынан кошумча 1000 метр тор суудан чыгарылды. Ушул эле аймакта мыйзамсыз аңчылык кылып жүргөн жаран кармалып, ага 12 500 сом өлчөмүндө айып салынды.
Рейддик иш-чаралар учурда да уланууда. Иштин жүрүшүндө инспекторлор алдын алуу иштерине өзгөчө көңүл бурушуп, балыкчылар жана эс алуучулар менен жаратылышты булгабоо, балык уулоо эрежелерин так сактоо боюнча түшүндүрүү иштерин жүргүзүштү.
Биологиялык ар түрдүүлүктү сактоо жана өлкөнүн суу ресурстарын коргоо багытында мамлекеттик көзөмөлдү күчөтүүнүн алкагында, Экологиялык жана техникалык көзөмөл кызматы мындай рейддерди республиканын ири суу объекттеринде туруктуу негизде өткөрүп келет.
