Баткен районунда сел тосмолору курулат
Өзгөчө кырдаалдар министри Канатбек Чыныбаев Баткен облусунда сел коркунучу бар аймактар менен таанышты. Алгач Баткен районунун Ак-Татыр айылындагы сел өткөрүүчү сайдын жээгин бекемдөө, бул багытта аткарылуучу жумуш боюнча тиешелүү адистер менен жеринде көрүп чыкты. Бул тууралуу аталган министрликтин басма сөз кызматы билдирди.
Маалыматка ылайык, 13 миңден ашуун калк жашаган Суу-Башы айыл өкмөтүнүн Бужум айылында да жаңы конушту өзгөчө кырдаалдардан коргоо максатында тосмо куруу зарыл. Бул боюнча жарандар Элдик курултайда өлкө башчысына кайрылуу жасашкан. Аталган обьектте болгон министр тиешелүү иш-кагаздарын бүткөрүү тапшырмасын коюп, андан соң КР ӨКМдин “Сел жана суу ташкындарынан коргоо” бөлүмүнүн обьектисинин негизинде коргоо чаралары ишке ашарын убада берди.
Андан соң, Таян айылындагы “Ысырык жай” участкасында болуп, болжол менен 100 метр аралыкка сел тосмо куруу зарылчылыгын көрдү. Сел кармоочу тосмо куруу үчүн жергиликтүү бийлик органдары тарабынан долбоордук изилдөө иштери аткарылгандыктан, аталган айылды сел коркунучунан коргоого алуу ӨКМ тарабынан колго алынарын белгиледи.
Ал эми 2026-жылдын 30-апрель күнү Кадамжай районунун Орозбеков айыл аймагында сел келген Тамаша сайы ички чарбалык жол катары пайдаланылгандыктан, кооптуулук жогору. Бул багытта район акими менен жеринде талкуу жүргүзүп, коргоо чараларын биргеликте ишке ашыруу каралды.
