Бишкек мэриясы шаардыктарды тазалыкка чакырган кайрылуу кылды
Бишкек шаарынын мэриясы борбордун тургундарына жана конокторуна кайрылды. Бул тууралуу аталган мэриянын басма сөз кызматы билдирди.
Мэриянын кайрылуусунда шаардыктарды тазалыкты сактоого чакырган. Арыктардын бүтөлүп, көчөлөр менен короолордун суу каптоосунун негизги себептеринин бири - арыктарга ташталган таштандылар. Мындай жоопкерчиликсиз мамиле көчөлөрдүн жана короолордун суу алдында калышына алып келүүдө.
Шаар тургундарын жана конокторун айлана-чөйрөнү таза сактоого, арыктарга таштанды ыргытпоого чакырабыз. Учурда шаардык кызматтар жана тиешелүү адистер суу ташкынынын кесепеттерин жоюу жана арыктарды тазалоо иштерин жүргүзүп жатышат.
"Шаарыбызды таза жана коопсуз сактоо - баарыбыздын жалпы милдетибиз. Биргелешип аракет кылуу менен гана таза жана коопсуз шаарды сактай алабыз", - дейт мэриянын кайрылуусунда.
