Каттоосу жок компаниялар объекттерди жарнамалоого жана сатууга тыюу салынат
Министрлер кабинети көп кабаттуу үйлөрдү үлүштүк негизде куруу тартибин өзгөрткөн мыйзам долбоорун коомдук талкууга чыгарды.
Маалыматка таянсак, жаңы сунуштарга ылайык, эми курулуш компаниялары жарандардын акчасын уруксатсыз ала албайт. Бардык объекттер мамлекеттик реестрге катталып, батир сатуу реестр аркылуу гана жүргүзүлөт.
Сатып алуучулардын акчасы банктардагы эсептерде сакталат, ал эми куруучу каражатты иштин ар бир этабы бүткөндө гана ала алат.
Мындан тышкары, “көмүскө схемаларга” тыюу салынып, батирлерди эки жолу сатууга жол берилбейт. Эгер курулуш токтоп калса, объектти башка компания же Мамлекеттик ипотекалык компания бүтүрүп берет.
Бийлик бул өзгөрүүлөр жарандарды алдамчылыктан коргоп, курулуш тармагында тартип орнотот деп эсептейт.
