Таластагы жолдордун курулуштарынын сапаты текшерилди
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, өлкө аймагында курулуп жаткан унаа жолдорунун курулушунун сапатына болгон көзөмөлдү күчөтүү максатында атайын рейддик иш-чаралар өткөрүлүүдө.
Рейддин алкагында министрликке караштуу Мамлекеттик архитектура-курулуш контролдоо департаменти жана курулушта сертификаттоонун республикалык борбору тарабынан Талас облусунда курулган жана курулуп жаткан бир катар жолдор текшерилди.
Көчмө лабораториялык текшерүүдө Бердике Баатыр көчөсү, Манас көчөсүн (Турсалиев-Шеркулов),Үмөт-Молдо көчөсүн,Шеркулов (Тагайбаев Огомбаевге чейин),Э.Мадиев (Айтматов көчөсүнөн А.Огомбаев көчөсүнө чейин), Оторбаев көчөсү (Алымкулов-Алымбеков чейин)жана башка көчөлөрдүн капиталдык оңдоо, реконструкция иштеринин сапаты каралды.
Аталган жолдордун жана тротуарлардын курулуш сапаты боюнча Талас регионалдык мамлекеттик архитектура-курулуш контролдоо башкармалыгы тарабынан подрядчы уюмдарга эскертүүлөр берилип, административдик чаралар көрүлдү.
Курулуш министрлиги эскертет, курулуш тармагындагы баардык субьекттердин белгиленген талаптарды так сактоого чакырат.
Белгилей кетсек, мындай рейддик иш-чаралар курулуп жаткан объектилердин ишенимдүүлүгүн камсыздоого, ошондой эле подряддык уюмдардын аткарылган иштердин сапаты үчүн жоопкерчилигин жогорулатууга багытталган.
