Бишкектеги тигүү фабрикасы 300дөн ашуун жумушчу издеп жатат
Эмгек, социалдык камсыздоо жана миграция министринин биринчи орун басары Камчыбек Досматов Чүй облусу жана Бишкек шаары боюнча аймактык башкармалыктардын жетекчилери менен биргеликте Бишкек шаарында жайгашкан “Jasmir Brand” тигүү фабрикасынын ишмердүүлүгү менен таанышты.
Ведомствонун маалыматына ылайык, 2024-жылдын май айында негизделген фабрика бүгүнкү күндө Кыргызстандагы өнүгүп келе жаткан ири тигүү өндүрүштөрүнүн бири болуп саналат. Ишкананын негизги багыты — жергиликтүү жарандарды жумуш менен камсыз кылуу, жаштарды кесипке үйрөтүү жана ата мекендик өндүрүштү эл аралык рынокко чыгаруу.
Учурда фабрикада жергиликтүү тургундар эмгектенип, тигилген продукциялар Орусия рыногуна экспорттолууда. Ошондой эле “Кыргызстанда жасалган” бренди алдындагы кийимдер онлайн платформалар аркылуу сатылып келет.
Фабрикада кызматкерлер үчүн заманбап эмгек шарттары түзүлгөн. Алар бекер жатакана жана түшкү тамак менен камсыз болуп, өндүрүштө конвейердик система колдонулууда. Бул иштин ылдамдыгын жана продукциянын сапатын жогорулатууга шарт түзүүдө.
Мындан тышкары, ишканада дуалдык окутуу системасы киргизилип, Эл аралык инновациялык технологиялар университети жана колледж менен биргеликте 100дөн ашуун студентке акысыз теориялык жана практикалык билим берилүүдө.
Фабриканын жетекчиси Жасур Парпиев учурда төрт цехке 300дөн ашуун тигүүчү талап кылынарын билдирди. Анын айтымында, кызматкерлер үчүн жатакана, тамак-аш жана алыскы аймактардан келгендерге жол кире чыгымдарын кароо мүмкүнчүлүгү да каралган.
