Чүйдө санитардык-гигиеналык продукцияларды чыгаруучу ишкана ачылды
Чүй облусунда Бренд КГ тарабынан ишке ашырылган балдар памперстерин жана санитардык-гигиеналык продукцияларды чыгаруучу өндүрүш ишканасынын ачылышы болду.
Иш-чарага Министрлер Кабинетинин Төрагасынын орун басары Э.Акунбеков, Президентке караштуу Инвестициялар боюнча улуттук агенттиктин башчысынын орун басары М.Койчуманов катышты.
Бул долбоор балдар памперстерин жана санитардык-гигиеналык продукцияларды чыгарган өлкөдөгү алгачкы ата мекендик өндүрүш болуп саналат. Компаниянын өндүрүш комплекси “Ак-Чий” ЭЭА аймагында жайгашып, заманбап жогорку технологиялык жабдуулар менен камсыздалган.
Долбоорду ишке ашыруу өлкөнүн өнөр жай потенциалын өнүктүрүүгө, жаңы жумуш орундарын түзүүгө, импортту алмаштырууга жана экспорттук мүмкүнчүлүктөрдү кеңейтүүгө багытталган. Ишкананын ишке кириши ички рыноктун импорттук продукцияга болгон көз карандылыгын азайтып, санитардык-гигиеналык товарлардын ата мекендик өндүрүшүнүн көлөмүн көбөйтүүгө өбөлгө түзөт деп күтүлүүдө.
Мындан тышкары, ишкана заманбап сапат жана коопсуздук стандарттарына жооп берген продукцияларды чыгарууга багытталган. Келечекте продукцияны Борбор Азия өлкөлөрүнүн рынокторуна экспорттоо мүмкүнчүлүгү да каралууда.
Иш-чаранын алкагында ишкананын расмий ачылышы болуп, заводдун өндүрүштүк кубаттуулугу жана чыгарылып жаткан продукциялар тааныштырылды.
