Кадамжайда жерлерди мыйзамсыз берген мурдагы жетекчилер кармалды
Кадамжай районунун Ак-Турпак айыл өкмөтүнүн мурдагы жооптуу кызмат адамдары тарабынан уюштурулган коррупциялык схема аныкталды. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, УКМК тарабынан жер мыйзамдары жаатындагы коррупциялык көрүнүштөрдү аныктоо жана бөгөт коюу боюнча жүргүзүлүп жаткан иш-чаралардын алкагында кылмыш иши козголгон.
Тергөөнүн жүрүшүндө Ак-Турпак айыл өкмөтүнүн мурдагы жетекчилери кызматтык абалынан пайдаланып, жеке материалдык пайда табуу максатында жарандарга турак жай куруу үчүн жер тилкелерин мыйзамсыз берип келишкени аныкталган.
Жүргүзүлгөн тергөө амалдарынын негизинде мурдагы жооптуу кызмат адамдары С.М.М. жана М.Ш.М. кармалып, сот тарабынан аларга карата үй камагы түрүндөгү бөгөт коюу чарасы тандалды.
Учурда УКМК тарабынан бул кылмыш ишине тиешеси бар башка адамдарды аныктоо жана аларды жоопкерчиликке тартуу боюнча тергөө-ыкчам иш-чаралары улантылууда.
