Манас шаарында 5200 орундуу спорт сарайынын курулушу жүрүүдө
Курулуш министрлиги тарабынан Манас шаарында 5200 орундуу заманбап борбордук спорт сарайынын курулушу жүрүүдө. Долбоор республикалык бюджеттин эсебинен каржыланууда. Бул тууралуу аталган министрликтин басма сөз кызматы билдирди.
Маалыматка караганда, Башкы план боюнча спорт сарайынын жалпы аянты 2,5 гектарды түзөт. Анда төрт кабаттуу административдик имарат, бассейн, машыгуу аянтчалары, VIP коноктор үчүн атайын орундуктар, жалпыга маалымдоо каражаттары үчүн аянтча, медициналык пункт, тамактануучу жана унаа токтотуучу жайлар каралган.
Курулуш-монтаждоо иштерин “Кыргызкурулуш” мамлекеттик ишканасы аткарууда. Учурда объектте курулуш иштери активдүү улантылып, белгиленген графиктин негизинде жүргүзүлүүдө.
Жаңы спорт сарайы пайдаланууга берилгенден кийин шаар тургундары үчүн ири спорттук жана маданий иш-чараларды өткөрүүгө мүмкүнчүлүк түзүлөт.
