Социалдык контракт аркылуу 57 миңден ашуун жумуш орду түзүлгөн
Эмгек, социалдык камсыздоо жана миграция министрлиги социалдык жардам алуу толугу менен ыктыярдуу негизде жүзөгө ашырыларын маалымдайт.
Социалдык контракт - бул жакыр же аз камсыз болгон үй-бүлө менен Эмгек, социалдык камсыздоо жана миграция министрлигинин аймактык бөлүмүнүн ортосунда түзүлгөн келишим. Программанын алкагында мамлекет жеке ишкердикти ачуу жана өнүктүрүү үчүн 150 миң сом өлчөмүндө кайтарымсыз жардам көрсөтөт.
Программа 2022-жылдан тартып ишке ашырылып келет. Алгач социалдык жардамдын көлөмү 100 миң сомду түзгөн болсо, 2025-жылы бул сумма 150 миң сомго чейин көбөйтүлгөн.
Программа ишке ашырыла баштагандан бери:
48 миңден ашуун үй-бүлө менен келишим түзүлгөн;
57 миңден ашуун жумуш орду түзүлгөн;
228 миңден ашуун жаран жашоо шарттарын жакшыртууда.
Долбоорго катышуу үчүн төмөнкү шарттар талап кылынат:
үй-бүлөнүн жакыр же аз камсыз болгон статусун тастыктаган документтин болушу;
үй-бүлөнүн социалдык контракт программасына катышууга ыктыярдуу макулдугу;
бизнес-пландын болушу;
эмгек жана мүлктүк потенциалдын болушу.
Мындан тышкары, социалдык контракттын негизинде социалдык жардам көрсөтүүнүн негизги принциптеринин бири - катышуунун ыктыярдуулугу болуп саналат.
