Бишкекте автобуска жасалма акча төлөө фактысы катталды
Бишкек шаарында №42 автобус каттамын тейлеген “Бишкек шаардык транспорт” муниципалдык ишканасынын айдоочусу эки жолу алдамчылыктын курмандыгы болгон. Бул тууралуу шаардык мэриянын басма сөз кызматынан кабарлашты.
Билдирүүгө караганда, жүргүнчү жол кирени төлөө учурунда 200 сомдук жасалма акчанын купюраларын колдонгон. Айдоочу банкноттордун жасалма экенин дароо байкаган эмес.
Ушуга байланыштуу Бишкек шаарынын мэриясы борбор калаанын тургундарын жана конокторун коомдук тартипти сактоого, коомдук транспорттун кызматкерлерине сый-урмат менен мамиле кылууга жана мыйзамга каршы аракеттерден алыс болууга чакырат.
💡
Кылмыш-жаза кодексине ылайык, жасалма акча жасоо, сактоо жана аны жүгүртүүгө чыгаргандар үч жылдан беш жылга чейин эркинен ажыратылып, мүлкү конфискацияланат. Ошондой эле ири суммада жана бир топ адамдар тарабынан жасалганы аныкталса, 20 жылга чейин эркинен ажыратылат.
