Электрондук акча мурас катары калтырылат
Жогорку Кеңеш Кыргызстанда электрондук акчаны мураска өткөрүү тартибин биринчи жолу мыйзам деңгээлинде бекиткен мыйзам долбоорун экинчи окууда жактырды.
Документ бир нече мыйзамга өзгөртүү киргизип, электрондук акчаны жарандык укуктун объектиси катары таанып, аны мураскорлорго өткөрүп берүүнү камсыз кылууну көздөйт.
Юстиция министринин орун басары Сагынбек Самидин уулу мурда белгилегендей, долбоорго ылайык Жарандык кодекске электрондук акча мүлктүн курамына кирери тууралуу норма кошулат.
Бул деген — электрондук капчыктардагы акча каражаттары кадимки банк эсептери сыяктуу эле мураска калтырылат дегенди билдирет.
“Төлөм системасы жөнүндө” мыйзамга да так процедуралар киргизилет: ээси каза болгондон кийин электрондук акчанын эмитенти нотариустун же мураскорлордун өтүнүчү менен операцияларды токтотууга, каражат бар-жогун аныктоого жана укук тастыкталгандан кийин аларды мураскорлорго өткөрүп берүүгө милдеттүү болот.
Ошондой эле “Банктар жана банк иши жөнүндө” мыйзамга өзгөртүү кирип, банктар нотариустарга каза болгон адамдардын депозиттери менен катар электрондук акча, сейфтик ячейкалар, металл эсептер жана башка активдер тууралуу маалымат берүүгө милдеттендирилет.
Өлкөдө 6,6 миллиондон ашык электрондук капчык катталган. Мураска өткөрүүнүн бирдиктүү эрежелеринин жоктугу талаш-тартыштарды жараткандыктан, бул мыйзам долбоору укуктук боштукту жоюп, жарандардын мүлктүк укуктарын коргойт.
