Кыргызстандын паспорту дүйнөлүк рейтингде 75-орунга көтөрүлдү
Henley & Partners тарабынан түзүлгөн жаңыланган Henley Passport Index боюнча Кыргызстан 2026-жылы дүйнөдө 75-орунду ээледи. Бул тууралуу Economist.kg аталган компаниянын маалыматына таянып, жарыялады.
Рейтингге ылайык, Кыргызстандын жарандары азыр дүйнөнүн 59 өлкөсүнө алдын ала виза албай эле бара алышат же барган жеринен виза алуу мүмкүнчүлүгүнө ээ болушат.
Кыргызстан бул көрсөткүч боюнча Өзбекстан менен бир катарда турат. Өзбекстандын жарандары үчүн да ушундай эле шарттар каралган. Борбор Азия өлкөлөрүнүн арасында эң жогорку көрсөткүчтү Казакстан ээлеп — 58-орун жана 78 багытка эркин кирүү мүмкүнчүлүгү берилген.
Ал эми Тажикстан 81-орунда жайгашып, анын жарандары 53 өлкөгө бара алышат. Түркмөнстан болсо 89-орунда болуп, 45 өлкөгө кирүү мүмкүнчүлүгүнө ээ.
Белгилей кетсек, Кыргызстан 2025-жылга салыштырмалуу позициясын жакшыртып, 77-орундан 75-орунга көтөрүлгөн. Жалпысынан рейтингде 199 өлкөнүн паспорту жана 227 туристтик багыт камтылган.
Дүйнөлүк рейтингде биринчи орунду Сингапур ээледи. Анын жарандары 192 өлкөгө визасыз саякаттай алышат. Экинчи орунду Бириккен Араб Эмираттары, Япония жана Түштүк Корея бөлүшүп, 187 багытка эркин кирүү мүмкүнчүлүгүнө ээ болду.
Ал эми тизмедеги мобилдүүлүк деңгээли эң төмөнкү өлкө катары Ооганстан, Сирия жана Ирак сыяктуу өлкөлөр толуктады.
