Манас шаарындагы курулуп жаткан объектилер текшерилди
Манас шаарынын мэри Абдупата Маткаликов тиешелүү мекеме-ишканалардын жетекчилери менен биргеликте шаар аймагында жүрүп жаткан курулуш иштеринин жүрүшү менен таанышты. Бул тууралуу шаардык мэриянын басма сөз кызматынан билдиришти.
Маалыматка ылайык, шаар башчысы алгач “Жеңиш” эс алуу багындагы реконструкция иштеринен кабар алды. Маалым болгондой, парктагы курулуш иштери дээрлик жыйынтыкталып, жакынкы күндөрү пайдаланууга берилери белгиленди.
Мындан тышкары, мэр жаңы базардын курулуш аймагын да кыдырып, андагы иштердин жүрүшү менен таанышты. Текшерүүнүн жүрүшүндө айрым кемчиликтерди жоюу, курулуш иштерин сапаттуу жана өз мөөнөтүндө бүтүрүү боюнча тиешелүү кызматтарга тапшырмалар берилди.
Ошондой эле шаар аймагындагы жол тыгындарын азайтуу, көрктөндүрүү жана жашылдандыруу иштерин күчөтүү, санитардык тазалыкты камсыздоо маселелерине өзгөчө көңүл буруу зарылдыгы белгиленип, тиешелүү жетекчилерге конкреттүү милдеттер жүктөлдү.
