Оштун Жапалак айылында бир катар объектилер ишке берилет
14-майда Ош шаарынын мэри Жанарбек Акаев күндүн экинчи жарымында Жапалак айылдык аймактык башкармалыгынын тургундары менен жолугушуу өткөрдү. Бул тууралуу мэриянын басма сөз кызматы билдирди.
Маалым болгондой, жолугушууда жергиликтүү тургундар тарабынан бир катар көйгөйлөр жана сунуштар айтылды. Атап айтканда, Мээркан айылындагы ички жолдорду асфальттоо, Көкүм-Бий көчөсүнүн кызыл сызыгын тактоо, Жапалак аймагынын жашыл аймактарын сактоо жана башкы планга байланышкан маселелер көтөрүлдү.
Мындан тышкары, жарандар таза суу, электр энергиясы, канализация тармактары боюнча көйгөйлөрдү айтып, көпчүлүгү жеке кайрылуулар менен да кайрылышты.
Шаар мэри көтөрүлгөн ар бир маселе тиешелүү кызматтар менен биргеликте этап-этабы менен чечилерин белгиледи. Ошондой эле ал учурда Жапалак аймагында үч мектептин, бир бала бакчанын жана үч кичи футбол аянтчасынын курулушу жүрүп жатканын маалымдады.
Мындан сырткары, жыл аягына чейин аймактагы бир катар айылдарда таза суу маселесин чечүү боюнча иштер бүткөрүлөрү айтылды.
Жолугушуунун жүрүшүндө шаар башчысы калктын жашоо шартын жакшыртуу, инфраструктураны өнүктүрүү жана социалдык объектилердин санын көбөйтүү багытындагы иштер мындан ары да уланарын белгиледи.
