Ысык-Көлдөн 2100 метр тор жана 760 кг таштанды чыгарылды
Экологиялык жана техникалык көзөмөл кызматынын Ысык-Көл регионалдык башкармалыгы Жаратылыш ресурстары, экология жана техникалык көзөмөл министрлигинин Ысык-Көл регионалдык башкармалыгы менен биргеликте Ысык-Көлдү браконьерлик торлордон тазалоо иштерин улантууда. Бул тууралуу аталган кызматтын басма сөз кызматы ырастады.
Маалыматка ылайык, 13-майда Президенттин №131 Жарлыгын аткаруунун алкагында жана браконьерликке каршы уюштурулган рейддин жүрүшүндө көлдүн түбүнөн 2100 метр эски кытайлык синтетикалык балык уулоочу тор чыгарылды.
Мындай торлор көлдүн экосистемасына өзгөчө коркунуч жаратат. Алар ташталып кеткенден кийин дагы балыктарды жана башка суу жаныбарларын жок кылууну улантып, көлдүн биологиялык тең салмагына олуттуу зыян келтирет. Мындан тышкары синтетикалык материалдар узак убакытка чейин чирибей, сууну булгап келет.
2026-жылдын башынан бери Экологиялык жана техникалык көзөмөл кызматынын Ысык-Көл регионалдык башкармалыгы тарабынан көлдүн түбүнөн жалпысынан 23 100 метр синтетикалык тор жана 760 килограмм таштанды чыгарылды.
Учурда браконьерликке каршы күрөш жана Ысык-Көлдүн экологиялык коопсуздугун камсыздоо боюнча рейддик иш-чаралар туруктуу негизде жүргүзүлүүдө. Текшерүүлөр көл жээгиндеги бардык райондордо улантылып жатат.
